قال الوداع .. وقلت هاذي دعابه
او كذبةِ ما لازمت فم كذّاب
حتى تبين كل معنى انسحابه
حب غريب و كلّنا فيه أغراب
تاهت حروفي في طلاسم كتابه
و تناثرت آهات في ليل مرتاب
عاد السؤال اللي خذلني جوابه
ليته تعذر او بقى دونه حجاب
ليتك تعيشي خدعته يا صبابه
عن لا تلاقي يوم مفقود لا صحاب
بين التجافي و التّناسي .. تشابه
و ماعدت اميز بين تجريح و عتاب
شفت الحقايق ما تبرر غيابه
و تعبت ادوّر له معاذير و اسباب
صدّه اكيد و كل حبه دعابه
وانا بحياته من محطات لا عجاب
