لمْت نفسي ليش ازّعلكم
وانتو الاحساس معناكم
ماحَلَى حبْكم وربعتكم
قلبي (الغالين) سمّاكم
************
يالطيفين الهوى روفوا
قلب من يومين في حاله
ياكم المتّعذب وشوفو
لا تخّلونه على حاله
************
يافؤادي وش بعد تبغي
يوم كل الزين عّدالك
قال ياحلى لي وانا أصغي
كلمة المحبوب وش حالك
************
يامْرادي انته البادي
يبن لي حبّك وغنّيته
واشترك في لحنك فوادي
طاب لي فنّك وحبّيته
************
عشْت في لذات واطعمها
بالهنا واقول مااحلاها
واتّضح للنفس مطمعها
إنت في اللذات أحلاها
************
إنت مقصوده وموعوده
قلب حصّل مطلبه عندك
شي م الآهات مقصوده
آتذكّرها انا بعدك
عبدالله العويس
