سكّنوني في حوي بيته
بس ما لي في العرب غايه
وش بلايه؟! قلت انا ميته
حالةٍ في العمر منهايه
ألف باب و باب صكّيته
صاحبي سلّمته الرّايه
في شبابه لي تمنيته
بيـــــــــن خلاّن الهوى آيه
شَيّْ له في الخاطر اخفيته
فوق وصف الحب معنايه
ما هناه الساهر امبيته
جرح شوق و نفس مدمايه
و ان عنيت الناصح و ييته
قال مالي في امرك ادرايه
و اشعل الساري ضيا زيته
من ضلوعي ياخذ اورايه
صاحبي لا ما تهنّيته
إقْصِرَتْه ايام مطوايه
زرع وردٍ في منابيته
اقطفوه و قالوا كْفايه
ليت لو تسمح مواقيته
عَ الوَعَد نفسي مضرّايه
ودّي اسكن في طرف بيته
و ما عرفت الغالي اش رايه
